Al-Maaida

لَا يُؤَاخِذُكُمُ ٱللَّهُ بِٱللَّغْوِ فِىٓ أَيْمَـٰنِكُمْ وَلَـٰكِن يُؤَاخِذُكُم بِمَا عَقَّدتُّمُ ٱلْأَيْمَـٰنَ ۖ فَكَفَّـٰرَتُهُۥٓ إِطْعَامُ عَشَرَةِ مَسَـٰكِينَ مِنْ أَوْسَطِ مَا تُطْعِمُونَ أَهْلِيكُمْ أَوْ كِسْوَتُهُمْ أَوْ تَحْرِيرُ رَقَبَةٍ ۖ فَمَن لَّمْ يَجِدْ فَصِيَامُ ثَلَـٰثَةِ أَيَّامٍ ۚ ذَٰلِكَ كَفَّـٰرَةُ أَيْمَـٰنِكُمْ إِذَا حَلَفْتُمْ ۚ وَٱحْفَظُوٓا۟ أَيْمَـٰنَكُمْ ۚ كَذَٰلِكَ يُبَيِّنُ ٱللَّهُ لَكُمْ ءَايَـٰتِهِۦ لَعَلَّكُمْ تَشْكُرُونَ ۸۹

{89} Yaani, katika viapo vyenu ambavyo mlivifanya kama njia ya mchezo. Navyo ni vile viapo ambavyo mwenye kuapa aliapa kwavyo bila ya nia wala kukusudia, au alivitilia nia akidhani kuwa yeye ni mkweli, lakini yakadhihirika yaliyo kinyume na hilo. Lakini atawachukulia dhambi kwa mnavyoapa kweli kweli kwa kukusudia; yaani, vile mlivyoviazimia na nyoyo zenu zikaviapa kwelikweli. Kama alivyosema katika Aya nyengine, "Bali anawachukulia ubaya kwa yale zinayoyachuma nyoyo zenu." "Basi kafara yake," yaani kafara ya kiapo mlichokifanya kwa nia yenu; "ni kuwalisha masikini kumi," na kulisha huko ni "kwa chakula cha wastani mnachowalisha ahali zenu, au kuwavisha." Yaani, kuwavisha masikini kumi na kuvisha ni kule kunakoruhusika kwa ajili ya Swala, "au kumuachilia huru mtumwa;" [yaani, kumkomboa mtumwa] mwanamke muumini, kama ilivyofungiwa hivyo katika pahali pasipokuwa mahali hapa. Basi pindi atakapofanya moja kati ya haya matatu; basi kiapo chake kitakuwa kimefunguka. "Na asiyepata" moja katika haya matatu, "basi na afunge siku tatu. Hii" iliyotajwa "ndiyo kafara ya viapo vyenu mnapoapa," inavifunika, na kuvifuta, na kuzuia kufanya dhambi. "Na hifadhini viapo vyenu," kutokana na kuapa kwa Mwenyezi Mungu kwa uongo, na kutokana na viapo vingi. Na vilindeni mnapoapa kutokana na kuvivunja, isipokuwa ikiwa kuvunja huko ni heri. Basi utimilifu wa kuhifadhi ni kwamba afanye heri hiyo wala kisiwe kiapo chake hicho sababu ya kuizuia heri hiyo. "Namna hivyo ndivyo Mwenyezi Mungu anawabainishia Aya zake," zinazobainisha halali, na haramu, zenye kuweka wazi hukumu mbalimbali; "ili mshukuru," mwenyezi Mungu; kwa kuwa aliwafundisha yale ambayo hamkuwa mnayajua. Basi ni juu ya Mja kumshukuru Mwenyezi Mungu Mtukufu juu ya yale aliyomneemesha kwayo miongoni mwa kujua hukumu za kisheria, na kuzibainisha.