As-Sajda

فَذُوقُوا۟ بِمَا نَسِيتُمْ لِقَآءَ يَوْمِكُمْ هَـٰذَآ إِنَّا نَسِينَـٰكُمْ ۖ وَذُوقُوا۟ عَذَابَ ٱلْخُلْدِ بِمَا كُنتُمْ تَعْمَلُونَ ۱۴

{14} "Basi onjeni kwa vile mlivyousahau mkutano wa Siku yenu hii." Yaani, wataambiwa wahalifu waliojawa na unyonge na wakaomba kurejea katika dunia hii, ili waweze kufanya yale yaliyowapita: Tayari muda wa kurejea umeshapita, na hakuna kilichobakia isipokuwa adhabu tu, basi onjeni adhabu chungu kwa sababu mlisahau kukutana na siku yenu hii. Na kusahau huku ni kule kusahau kwa kuacha; yaani, kwa sababu ya yale mliyotapuuza na mkaacha kufanya matendo mema kwa ajili yake, na ni kana kwamba hamtaijia wala hamtakutana nayo, kwa yale mliyokuwa mkiyatenda."Na Sisi hakika tunakusahauni," na tunawaacha katika adhabu kuwa ni malipo ya aina sawa na vitendo vyenu. Kama vile mlivyosahau, ndivyo mlivyosahauliwa "Basi onjeni adhabu ya milele," isiyokatika. Kwani, adhabu inapokuwa na muda maalumu na mwisho, inakuwa na unafuu fulani ndani yake. Na ama adhabu ya Jahannamu - Mwenyezi Mungu atulinde kutokana nayo - humo hakuna kupumzika wala raha wala kukatika kuadhibiwa kwao, "kwa yale mliyokuwa mkiyatenda" ya ukafiri, kuvuka mipaka na maasia.