Al-Baqara

وَٱذْكُرُوا۟ ٱللَّهَ فِىٓ أَيَّامٍ مَّعْدُودَٰتٍ ۚ فَمَن تَعَجَّلَ فِى يَوْمَيْنِ فَلَآ إِثْمَ عَلَيْهِ وَمَن تَأَخَّرَ فَلَآ إِثْمَ عَلَيْهِ ۚ لِمَنِ ٱتَّقَىٰ ۗ وَٱتَّقُوا۟ ٱللَّهَ وَٱعْلَمُوٓا۟ أَنَّكُمْ إِلَيْهِ تُحْشَرُونَ ۲۰۳

Mwenyezi Mungu Mtukufu anaamrisha kumtaja Yeye katika siku zinazohesabiwa, ambazo ni zile siku tatu za Tashriiq baada ya Idi. Kwa sababu ya umaalumu wake na utukufu wake, na kwa kuwa matendo yaliyobaki ya Hijja hufanyika ndani yake na kuwa watu ni wageni wa Mwenyezi Mungu ndani yake. Na kwa sababu hii, imeharamishwa kufunga Saumu ndani yake. Kwa hivyo kumtaja Mwenyezi Mungu ndani yake kuna umaalumu ambao hauko katika siku zinginezo. Na ndiyo maana Nabii rehema na amani za Mwenyezi Mungu ziwe juu yake, akasema. “Siku za tashriiq ni siku za kula, kunywa, na kumtaja Mwenyezi Mungu”. Na inaingia katika hilo kumtaja Mwenyezi Mungu katika hizo siku, kumtaja wakati wa kutupa vijiwe kwenye Jamaraat, na wakati wa kuchinja, na utajo unaofanya baada ya swala za faradhi tu. Bali baadhi ya wanachuoni walisema: “Inapendekezwa mtu kufanya takbira isiyo na mipaka, kama inavyokuwa katika zile siku kumi za kwanza za Dhul-Hijja”. Na hili haliko mbali (na usawa). “Lakini mwenye kufanya haraka (akarejea) katika siku mbili.” Yani alitoka Mina kabla ya kuzama kwa jua katika siku ya pili (baada ya siku ya Idi), “basi hakuna dhambi juu yake. Na mwenye kukawia” kwa kulala huko (Mina) usiku wa kuamkia siku ya tatu (baada ya Idi) na kesho yake akatupa vijiwe kwenye Jamaraat, “pia hakuna dhambi juu yake”. Na huku ni kupunguziwa kutoka kwa Mwenyezi Mungu [Mtukufu] kwa waja wake katika kuruhusu mambo hayo mawili. Lakini inajulikana kwamba ikiwa mambo mawili yanaruhusiwa, basi (jambo) la nyuma ndilo bora zaidi, kwa sababu lina ibada nyingi zaidi. Na kwa kuwa huenda ikafahamika kutokana na kukanusha dhambi kuwa ni kukanusha dhambi katika hilo lililotajwa na mengineyo. Na ukweli ni kwamba dhambi imekanushwa kwa aliyetanguliza na aliyechelewesha peke yao. Akazuia hilo (la kukanusha dhambi) kwa kauli yake, “kwa mwenye kumcha Mungu”. Yani alimcha Mwenyezi Mungu katika mambo yake yote na hali za Hijja. Kwa hivyo, mwenye kumcha Mwenyezi Mungu katika kila kitu, basi akapata kukanushiwa dhambi katika kila kitu. Na mwenye kumcha katika kitu na siyo katika kitu kingine, malipo yake yanakuwa ya aina sawa na matendo yake. “Na mcheni Mwenyezi Mungu” kwa kutekeleza maamrisho yake na kujiepusha na maasia yake. “Na jueni kwamba nyinyi mtakusanywa kwake,” na awalipe kwa matendo yenu. Kwa hivyo, mwenye kumcha, atapata malipo ya uchamungu kwake. Na yule asiyemcha, atamuadhibu adhabu kali kabisa. Hivyo basi, kujua malipo, ni miongoni mwa sababu kubwa zaidi zenye kusababisha kumcha Mwenyezi Mungu. Ndio maana Mwenyezi Mungu Mtukufu akahimiza kwamba hilo lijulikane.