At-Tawba

لَوْ خَرَجُوا۟ فِيكُم مَّا زَادُوكُمْ إِلَّا خَبَالًا وَلَأَوْضَعُوا۟ خِلَـٰلَكُمْ يَبْغُونَكُمُ ٱلْفِتْنَةَ وَفِيكُمْ سَمَّـٰعُونَ لَهُمْ ۗ وَٱللَّهُ عَلِيمٌۢ بِٱلظَّـٰلِمِينَ ۴۷

{47} Kisha akataja hekima katika hayo, akasema: "Lau wangelitoka kati yenu, wasingeliwazidisha isipokuwa mchafuko." Yaani, upungufu, "na wangetangatanga kati yenu;" yaani, wangewania katika kutia fitina na uovu baina yenu na wangegawanya kundi lenu lililokusanyika pamoja "wakiwatakia fitina." Yaani, wana hima kubwa ya kuwatilia fitina na kuwekea uadui baina yenu, "Na miongoni mwenu" kuna watu madhaifu wa akili "wanaowasikiliza sana." Yaani, wanaitikia wito wao na wanadanganyika nao. Kwa hivyo, ikiwa wana hima kubwa ya kuwaangusha, na kuwatilia uovu kati yenu, na kuwazuia dhidi ya maadui zenu, na wapo miongoni mwenu wale wanaokubali kutoka kwao na kutaka ushauri wao, mnaonaje uovu utakaotokea katika kutoka kwao pamoja na Waumini na hasara yao kubwa? Kwa hivyo, Mwenyezi Mungu ana hekima kamili zaidi alipowakatisha tamaa na kuwazuia kutoka pamoja na waja wake Waumini kwa ajili ya kuwarehemu na kuwafanyia upole ndiyo wasiingiliwe na kisichowanufaisha, bali kinawadhuru. "Na Mwenyezi Mungu anawajua madhalimu" na anawafundisha waja wake jinsi ya kujitahadharisha nao, na anawabainishia maovu yanayotokana na kuchanganyika nao.