Fussilat

وَأَمَّا ثَمُودُ فَهَدَيْنَـٰهُمْ فَٱسْتَحَبُّوا۟ ٱلْعَمَىٰ عَلَى ٱلْهُدَىٰ فَأَخَذَتْهُمْ صَـٰعِقَةُ ٱلْعَذَابِ ٱلْهُونِ بِمَا كَانُوا۟ يَكْسِبُونَ ۱۷

{17} "Na ama Thamudi" nao ni kabila mashuhuri waliokuwa wakiishi Al-Hijr na viunga vyake, ambao Mwenyezi Mungu aliwatumia Nabii Swaleh, amani iwe juu yake, akiwalingania kumpwekesha Mola wao Mlezi na akiwakataza shirki. Mwenyezi Mungu aliwapa ngamia wa kike iwe ni ishara kubwa kwao. Awe akinywa maji siku yake bila ya wao kumtunza. Bali alikuwa akila mwenyewe katika ardhi ya Mwenyezi Mungu. Ndiyo maana akasema hapa: "Na ama Thamudi, tuliwaongoza." Hapa alitaja hasa suala la kuwaongoza pamoja na kwamba umma wote walioangamizwa walisimamishiwa hoja na wakabainishiwa mambo, kwa sababu ishara ya akina Thamud ni ishara inayong’aa sana, waliyoiona wadogo wao na wakubwa wao, wa kiume wao na wa kike wao, nayo ilikuwa ishara ya kuonekana wazi. Ndiyo maana akawataja hasa kwamba aliwabainishia na kuwaongoza zaidi, lakini kwa sababu ya dhuluma yao na uovu wao wakapendelea "upofu" ambao ni ukafiri na upotofu "kuliko uwongofu" ambao ni elimu na imani, basi ikawachukua "adhabu" kwa sababu ya yale waliyokuwa wakiyachuma, na sio kwa sababu Mwenyezi Mungu aliwadhulumu.