Ar-Room

بَلِ ٱتَّبَعَ ٱلَّذِينَ ظَلَمُوٓا۟ أَهْوَآءَهُم بِغَيْرِ عِلْمٍ ۖ فَمَن يَهْدِى مَنْ أَضَلَّ ٱللَّهُ ۖ وَمَا لَهُم مِّن نَّـٰصِرِينَ ۲۹

{29} Ikishajulikana kutokana na mfano huu kwamba anayemfanyia Mwenyezi Mungu mshirika akamuabudu na kumtegemea katika mambo yake, huyo hana haki yoyote katika hayo, basi ni nini kilichomsukuma kufanya jambo hili batili, ambalo ubatili wake uko wazi na uthibitisho wake umedhihirika? Hili lilisababishwa na kufuata kwao matamanio yao, na ndiyo maana akasema, "Bali waliodhulumu wamefuata mapendo ya nafsi zao pasina kujua." Nafsi zao pungufu na ambao upungufu wake umedhihirika na ambazo matamanio yake yamefungamana na mambo ambayo akili ina uhakika kwamba ni mabovu, na pia maumbile ya asili yanayakataa, hayo wanayafanya bila ya elimu yoyote iliyowaelekeza kwayo wala hata hoja iliyowafikisha kwayo. "Basi ni nani atamwongoa ambaye Mwenyezi Mungu amempoteza?" Yaani, msishangae kutoongoka kwao. Kwani Mwenyezi Mungu Mtukufu aliwapoteza kwa dhuluma yao, na hakuna njia yoyote ya kuwaongoa yule ambaye Mwenyezi Mungu amempoteza. Kwa sababu hakuna yeyote anayeweza kumpinga Mwenyezi Mungu au kubishana naye katika ufalme wake, "Wala hao hawatakuwa na wa kuwanusuru;" neno la adhabu litakapowastahiki, na wakakatikiwa mafungamano yao na njia zao.