Al-Anfaal

وَإِذْ زَيَّنَ لَهُمُ ٱلشَّيْطَـٰنُ أَعْمَـٰلَهُمْ وَقَالَ لَا غَالِبَ لَكُمُ ٱلْيَوْمَ مِنَ ٱلنَّاسِ وَإِنِّى جَارٌ لَّكُمْ ۖ فَلَمَّا تَرَآءَتِ ٱلْفِئَتَانِ نَكَصَ عَلَىٰ عَقِبَيْهِ وَقَالَ إِنِّى بَرِىٓءٌ مِّنكُمْ إِنِّىٓ أَرَىٰ مَا لَا تَرَوْنَ إِنِّىٓ أَخَافُ ٱللَّهَ ۚ وَٱللَّهُ شَدِيدُ ٱلْعِقَابِ 48

{48} “Na wakati Shetani alipowapambia vitendo vyao;” yaani, alivifanya kuonekana kuwa vizuri katika nyoyo zao, na akawahadaa “na akasema, "Hakuna yeyote wa kuwashinda leo hii katika watu” kwa maana, mna idadi kubwa, na maandalizi imara, na haiba ambayo Muhammad na wale walio pamoja naye hawataweza kuwapinga. "Nami hakika ni mlinzi wenu," asije akawajia yeyote miongoni mwa wale mnaohofia mashambulizi yake. Kwa sababu Iblis aliwatokea Maquraishi kwa mfano wa Suraqa bin Malik bin Jash’am Al-Mudliji, na walikuwa wakiwahofu Banu Mudlij kwa sababu ya uadui uliokuwa baina yao. Kwa hivyo Shetani akawaambia, “Mimi ni mlinzi wenu!” Kwa hivyo nafsi zao zikatulia, kwa hivyo wakaja makusudi wakidhani wana uwezo. Basi "yalipoonana makundi mawili hayo," waislamu na makafiri, na Shetani akamuona Jibril amani iwe juu yake akiwahamisha Malaika, akahofu hofu kubwa, na "akarudi nyuma juu ya visigino vyake," yaani akageuka akenda zake. "Na akasema" akiwaambia wale aliowadanganya na kuwahadaa: "Hakika mimi niko mbali sana nanyi. Hakika mimi naona msiyoyaona;" yaani, ninawaona Malaika ambao hakuna yeyote anayeweza kupigana nao. "Hakika mimi ninamhofu Mwenyezi Mungu;" yaani, ninahofu kwamba ataniadhibu kwa haraka katika dunia, “na Mwenyezi Mungu ni mkali wa kuadhibu.” Na inawezekana kwamba Shetani aliwashawishi, na kuwatia wasiwasi katika vifua vyao kwamba hakuna yeyote wa kuwashinda leo katika watu, kwamba yeye ni mlinzi wao. Kwa hivyo alipowafikisha walipokuwa wanakwenda, akageuka akawaacha, akajitenga nao. Kama alivyosema Mwenyezi Mungu Mtukufu, “Ni kama mfano wa Shetani anapomwambia mtu, “Kufuru.” Na anapokufuru, humwambia: Hakika mimi niko mbali sana nawe. Hakika mimi namhofu Mwenyezi Mungu, Mola Mlezi wa walimwengu wote. Basi ikawa mwisho wa wote wawili hao ni kwamba wako katika Moto, wadumu humo, na hayo ndiyo malipo ya madhalimu.”