Al-A'raaf

وَٱكْتُبْ لَنَا فِى هَـٰذِهِ ٱلدُّنْيَا حَسَنَةً وَفِى ٱلْـَٔاخِرَةِ إِنَّا هُدْنَآ إِلَيْكَ ۚ قَالَ عَذَابِىٓ أُصِيبُ بِهِۦ مَنْ أَشَآءُ ۖ وَرَحْمَتِى وَسِعَتْ كُلَّ شَىْءٍ ۚ فَسَأَكْتُبُهَا لِلَّذِينَ يَتَّقُونَ وَيُؤْتُونَ ٱلزَّكَوٰةَ وَٱلَّذِينَ هُم بِـَٔايَـٰتِنَا يُؤْمِنُونَ 156

{156} Na Musa akasema katika kukamilisha dua yake: "Na tuandikie mazuri katika dunia hii" miongoni mwa elimu yenye manufaa, na riziki kunjufu, na matendo mema, "na katika Akhera" utupe heri. Nayo ni yale ambayo Mwenyezi Mungu aliwatayarishia marafiki wake wandani walio wema miongoni mwa thawabu. "Hakika sisi tumerejea kwako;" yaani, tumerudi huku tumekiri kufanya kwetu upungufu, na wenye kutubia kwako katika mambo yetu yote. "Akasema" Mwenyezi Mungu Mtukufu, "Adhabu yangu nitamsibu kwayo nimtakaye" miongoni mwa wale waliokuwa waasi, wenye kuzifanya sababu zake. "Na rehema yangu imeenea kila kitu," katika ulimwengu wa juu na wa chini, mwema na muovu, Muumini na kafiri, basi hakuna kiumbe chochote isipokuwa kilikwishafikiwa na rehema ya Mwenyezi Mungu, na kikafunikwa na fadhila yake na wema wake. Lakini rehema maalum inayosababisha furaha ya dunia na Akhera si ya kila mmoja. Na ndiyo maana akasema kuihusu: "Basi nitaiandika hii hasa kwa wale wanaomcha Mungu" kutokana na maasia madogo yake na mkubwa yake. "Na wanaotoa Zaka” kuwapa wastahiki wake, "na wale ambao wanaziamini Ishara zetu.”