At-Tur

مُتَّكِـِٔينَ عَلَىٰ سُرُرٍ مَّصْفُوفَةٍ ۖ وَزَوَّجْنَـٰهُم بِحُورٍ عِينٍ 20

{20} "Watakuwa wameegemea juu ya viti vya enzi vilivyopangwa kwa safu." Na Mwenyezi Mungu amevielezea viti hivyo kwamba vilipangwa kwa safu ili hilo liashirie wingi wake, na uzuri wa mpangilio wake na mkusanyiko wa watu wake, na furaha yao kwa sababu ya kuishi kwao pamoja kwa uzuri, na kufanyiana kwao upole. Wakati furaha ya moyo, nafsi, na mwili ilipokusanyika kwa ajili yao, kutokana na yale yasiyofikirika akilini wala hata kuzunguka mawazani kama vile chakula kitamu na vinywaji, na mahali pa kukaa pazuri na ya kifahari, halikubakia lolote ila kustareheshwa kwa wanawake ambao kwamba haitimii furaha isipokuwa kwa hao. Basi Mwenyezi Mungu Mtukufu akataja kwamba wana wake wakamilifu katika sifa zao, maumbile yao na maadili yao, na ndiyo maana akasema: "Na tutawaoza mahurulaini." Nao ni wanawake ambao wamekusanya uzuri wa sura ya nje na pamoja uzuri wake mkubwa, na ni wenye tabia njema ambayo kwayo inasababisha kuwachanganya wenye kutazama kwa sababu ya uzuri wake, na kukanganya akili za walimwengu, na mioyo inakaribia kuruka kwa hamu kubwa ya kuwataka na kuwafikia. Nao ni wenye macho mazuri yenye weupe na weusi uliobanika wazi.