Fussilat

فَقَضَىٰهُنَّ سَبْعَ سَمَـٰوَاتٍ فِى يَوْمَيْنِ وَأَوْحَىٰ فِى كُلِّ سَمَآءٍ أَمْرَهَا ۚ وَزَيَّنَّا ٱلسَّمَآءَ ٱلدُّنْيَا بِمَصَـٰبِيحَ وَحِفْظًا ۚ ذَٰلِكَ تَقْدِيرُ ٱلْعَزِيزِ ٱلْعَلِيمِ 12

{12} "Basi akazifanya mbingu saba kwa siku mbili," kwa hivyo uumbaji wa mbingu na ardhi ukakamilika katika siku sita; ya kwanza yake ikiwa ni siku ya Jumapili na ya mwisho yake ikiwa ni siku ya Ijumaa, ingawa uwezo wa Mwenyezi Mungu na mapenzi yake yanaweza kuumba vyote hivyo katika wakati mmoja. Lakini Yeye ni mwenye uwezo wote, Yeye ni mwenye hekima, mpole. Katika hekima yake na upole wake ni kwamba aliviumba hivi katika kipindi hiki kilichopimwa. Jua kwamba kuna dhana ya kupingana katika maana ya dhahiri ya Aya hii na kauli yake Mtukufu katika Surat Naziat, pale alipotaja kuumbwa kwa mbingu, akasema: "Na juu ya hivyo ameitandaza ardhi." Ingawa hakuna kupingana au kutofautiana katika Kitabu cha Mwenyezi Mungu! Jibu la hilo ni kama walivyosema wengi wa wema waliotangulia kwamba: kuumbwa kwa ardhi na kuitia sura kulitangulia kuumbwa mbingu kama ilivyo hapa. Na maana ya kuitandaza ardhi ni kwamba "alitoa ndani yake maji yake na malisho yake. Na milima akaisimamisha" baada ya kuumbwa mbingu. Kama ilivyo katika Surat An-Nazi'at. Ndiyo maana akasema [ndani yake]: "Na juu ya hivyo ameitandaza ardhi. Akatoa ndani yake." Hadi mwisho wa aya hizi. Na wala hakusema: 'Na baada ya hayo,akaiumba ardhi.' Na kauli yake: "na akazipangia kila mbingu mambo yake" yanayolingana nayo, ambayo yalihitajiwa na hekima ya muadilifu kuliko mahakimu wote. "Na tukaipamba mbingu ya chini kwa mataa" ambayo ni nyota. Kwazo watu wanapata mwangaza na kuongozwa njia, nazo pia ni pambo na urembo kwa mbingu, na tena zinatumika katika kuwapiga vimondo mashetani; ili wasisikilize kwa siri mambo ya huko. "Hiki" kilichotajwa kuhusiana na ardhi na vilivyomo ndani yake, na mbingu na vilivyomo ndani yake, "ndicho kipimo cha Mwenye Nguvu, ajuaye zaidi." Ambaye nguvu yake ilishinda vitu vyote, ikaviendesha, na kwayo akaumba viumbe vyote. "Ajuaye zaidi," ambaye elimu imewazunguka viumbe, na mambo ya ghaibu na yale yanayoonekana. Basi washirikina kuacha kumkusudia Mola huyu Mlezi, Mkuu, Mmoja, Mshindi, ambaye viumbe vinanyenyekea kwa amri yake, na inatekelezeka kwao mipangilio yake, ni miongoni mwa mambo ya ajabu sana. Na kumfanyia wenza, wakawafanya sawa naye ilhali wenza hao ni wapungufu katika sifa zao na vitendo vyao ni jambo la kushangaza zaidi. Na hakuna dawa kwa watu hawa ikiwa wataendelea kupeana mgongo isipokuwa adhabu za duniani na za akhera; Ndiyo maana akawatia hofu kwa kauli yake: