An-Nisaa

وَٱلَّذِينَ يُنفِقُونَ أَمْوَٰلَهُمْ رِئَآءَ ٱلنَّاسِ وَلَا يُؤْمِنُونَ بِٱللَّهِ وَلَا بِٱلْيَوْمِ ٱلْـَٔاخِرِ ۗ وَمَن يَكُنِ ٱلشَّيْطَـٰنُ لَهُۥ قَرِينًا فَسَآءَ قَرِينًا 38

{38} Kisha akajulisha juu ya matumizi yatokanayo na kujionyesha, kutaka sifa, na kutokuwa na imani naye, akasema, “Na ambao hutoa mali zao ili kujionyesha kwa watu.” Yani ili wawaone, na kuwasifu, na kuwatukuza. “wala hawamwamini Mwenyezi Mungu wala Siku ya Mwisho.” Yani kutoa kwao matumizi hakutokani na kumkusudia na kumuamini Mwenyezi Mungu peke yake na kutaraji thawabu zake. Yani hizi ni katika hatua za Shetani na matendo yake ambayo anawalingania kundi lake ili wawe miongoni mwa wenza wa Moto wenye mwako mkali, na kulitoka kwao kwa sababu ya yeye kuwa mwenza wao na kuwahimiza kufanya hivyo. Ndiyo maana akasema, “Na yule ambaye Shetani amekuwa ndiye mwenza wake, basi ana mwenza mbaya mno.” Yani mwenza mbaya zaidi na sahibu ni yule anayetaka kumwangamiza yule anayemfanya kuwa mwenza, na akafanya juhudi kubwa sana katika hilo. Na kama vile mwenye kufanyia ubahili yale ambayo Mwenyezi Mungu alimpa, na akaficha yale aliyomneemesha nayo Mwenyezi Mungu ni muasi, mwenye dhambi, anayemhalifu Mola wake Mlezi, kadhalika anayetoa na kumfanyia ibada asiyekuwa Mwenyezi Mungu, yeye pia ni mkosaji, mwenye kumuasi Mola wake Mlezi, na anastahili adhabu. Kwa sababu, Mwenyezi Mungu aliamrisha utiifu kwake tu, na kufuata amri yake kwa njia ya kumfanyia Yeye tu. Kama alivyosema Yeye Mtukufu, “Nao hawakuamrishwa isipokuwa kwamba wamwabudu Mwenyezi Mungu kwa ikhlas (nayo ni kumfanyia Yeye peke yake tu) katika Dini.” Na kwa sababu hii, matendo yanayokubalika, ni yale ambayo mwenyewe anastahili sifa na thawabu. Ndiyo maana Mola Mtukufu akamhimiza juu yake kwa kauli yake: