An-Nisaa

وَإِنْ خِفْتُمْ أَلَّا تُقْسِطُوا۟ فِى ٱلْيَتَـٰمَىٰ فَٱنكِحُوا۟ مَا طَابَ لَكُم مِّنَ ٱلنِّسَآءِ مَثْنَىٰ وَثُلَـٰثَ وَرُبَـٰعَ ۖ فَإِنْ خِفْتُمْ أَلَّا تَعْدِلُوا۟ فَوَٰحِدَةً أَوْ مَا مَلَكَتْ أَيْمَـٰنُكُمْ ۚ ذَٰلِكَ أَدْنَىٰٓ أَلَّا تَعُولُوا۟ 3

{3} Yani, na mkiogopa kuwa hamtafanya uadilifu kwa mayatima wanawake [ambao] wako chini ya ulinzi wenu na katika ulezi wenu, na mkaogopa kuwa hamtawatekelezea haki zao kwa kuwa hamuwapendi, basi waendeeni wengineo, na muoe, "mnaowapenda katika wanawake." Yani, mliowachagua miongoni mwa wanawake wenye dini, na mali, na urembo, na heshima, na nasaba, na yasiyokuwa hayo katika sifa zinazosababisha kuwaoa. Basi chagueni kwa rai yenu. Na miongoni mwa bora zaidi kinachochaguliwa katika hayo ni sifa ya dini, kama alivyosema Nabii - rehema na amani za Mwenyezi Mungu ziwe juu yake, - “Mwanamke anaolewa kwa sababu nne: kwa mali yake, na kwa urembo wake, na kwa nasaba yake, na kwa dini yake. Basi jishindie mwenye dini, mkono wako wa kulia ukajipake vumbi.” Na katika aya hii, kuna kwamba mtu anapaswa kuchagua kabla ya kufunga ndoa. Bali Mwenye Sheria alimruhusu kumtazama yule ambaye anataka kumuoa. Ili aoe baada ya kuwa na elimu juu ya jambo lake hili. Kisha akataja idadi ya wanawake aliowaruhusu, na akasema, "Wawili au watatu au wanne." Yani mwenye kupenda kuchukua wawili; na afanye, au watatu; na afanye, au wanne; na afanye, wala asiongeze juu ya hiyo. Kwa sababu, Aya hii ilitajwa ili kuonyesha neema. Kwa hivyo, hairuhusiwi kuzidisha juu ya yale aliyoyataja Mwenyezi Mungu kwa kauli moja. Na hilo ni kwa sababu mwanamume huenda matamanio yake yasiishe kwa mmoja, basi akaruhusiwa mmoja baada ya mwingine mpaka wafike wanne. Kwa sababu, katika wanne kuna kutoshelezwa kwa kila mtu isipokuwa katika hali adimu. Na pamoja na haya, yeye anaruhusiwa kufanya hivyo ikiwa nafsi yake itakuwa salama kutokana na dhuluma, na akajiamini katika kuwatekelezea haki zao. Lakini akiogopa kitu katika jambo hili, basi na aachie kwa mmoja au yule ambaye mkono wake wa kulia unamiliki. Kwa sababu, si wajibu kwake kugawanya kwa usawa katika wanawake ambao mkono wake wa kulia unamiliki. "Hilo," yani, kumwoa mmoja tu au yule ambaye mkono wake wa kulia unamiliki, "ndilo karibu zaidi kwamba msiegemee;" yani, kudhulumu. Na katika hili kuna kwamba mja hapaswi kuliendea jambo ambalo anahofiwa kufanya dhuluma na kutotekeleza wajibu hata ikiwa linaruhusika. Bali inalazimu awe na wasaa na kuwa salama. Kwa maana, kuwa salama ndicho kitu bora zaidi anachoweza mja kupewa.