An-Nahl

أَفَأَمِنَ ٱلَّذِينَ مَكَرُوا۟ ٱلسَّيِّـَٔاتِ أَن يَخْسِفَ ٱللَّهُ بِهِمُ ٱلْأَرْضَ أَوْ يَأْتِيَهُمُ ٱلْعَذَابُ مِنْ حَيْثُ لَا يَشْعُرُونَ 45 أَوْ يَأْخُذَهُمْ فِى تَقَلُّبِهِمْ فَمَا هُم بِمُعْجِزِينَ 46 أَوْ يَأْخُذَهُمْ عَلَىٰ تَخَوُّفٍ فَإِنَّ رَبَّكُمْ لَرَءُوفٌ رَّحِيمٌ 47

{45 - 47} Huku ni kuhofisha kutoka kwa Mwenyezi Mungu Mtukufu kwa wenye kukufuru na kukadhibisha na aina mbalimbali za maasia kwamba, anaweza kuwachukua kwa adhabu katika hali ya kughafilika kwao hali ya kuwa hawahisi. Ima awachukue kwa adhabu ya kutokea juu yao, au kutokea chini yao kwa kuwadidimiza au mfano wake. Na ima iwajie huku wako katika harakati zao na shughuli zao hali ya kuwa hawafikirii adhabu kabisa. Na ima huku wana hofu juu ya adhabu. Basi hawawezi kumshinda Mwenyezi Mungu katika hali miongoni mwa hali hizi zote. Lakini wao wako chini ya mshiko wake, nywele za mbele ya vichwa vyao ziko mkononi mwake. Lakini hawaadhibu kwa sababu yeye ni Mwenye huruma kubwa, Mwingi wa kurehemu. Hawaharakishii adhabu waasi, bali huwapa muhula, na salama, na kuwaruzuku, ilhali wao wanamuudhi yeye na wanawaudhi marafiki wake. Lakini pamoja na hayo, Yeye hufungulia milango ya toba, na anawaita waachane na mambo mabaya ambayo yanawadhuru, na anawaahidi kwa hilo heshima kubwa sana, na msamaha kwa dhambi walizofanya. Basi na astahi muhalifu Mola wake Mlezi kwamba awe anateremkiwa na neema zake kila wakati ilhali maasi yake nayo yanapanda kwa Mola wake Mlezi kila wakati. Na ajue kwamba Mwenyezi Mungu hupeana muhula na wala hapuuzi. Na kwamba anapomchukua, anamshika mshiko wa Mwenye nguvu, Mwenye uwezo. Basi na atubie kwake, na arejee kwake katika mambo yote. Kwa maana Yeye ni Mwenye huruma kubwa, Mwenye kurehemu. Basi na mtu aharakishe, tena aharakishe kuziendea rehema zake pana, na wema wake wa jumla, na kushika njia zifikishazo katika fadhila za Mola wake Mlezi, Mwingi wa kurehemu. Tazama! Nazo ni kumcha Yeye, na kutenda yale anayoyapenda na kuyaridhia.