Fussilat
Ini ialah terjemahan Tafsir as-Saʿdī seperti yang diterbitkan oleh IslamHouse.com di saadi.islamenc.com, dibaca daripada halaman-halaman laman itu. Laman itu tidak menyatakan siapa yang menterjemahkannya atau edisi cetakan mana yang diikutinya, dan tidak menyatakan syarat untuk mengambil teksnya, maka hak untuk memaparkannya belum disahkan. Belum ada sesiapa yang membandingkannya dengan buku bercetak, dan tiada ulama yang menyemaknya. Setiap bahagian berada di sisi ayat-ayat yang diulasnya, iaitu teks Al-Quran daripada Tanzil, dipaparkan seperti yang ada di sana; ayat yang tidak diberi ulasan tersendiri oleh laman itu berada bersama bahagian sebelumnya, dan indeks menamakan setiap ayat sedemikian. Sabīl tidak menulis atau menterjemahkan satu pun daripadanya.
Teks daripadasaadi.islamenc.comIslamHouse.comnone stated (the site names no licence and no terms for taking its text)diambil pada 2026-10-22
إِلَيْهِ يُرَدُّ عِلْمُ ٱلسَّاعَةِ ۚ وَمَا تَخْرُجُ مِن ثَمَرَٰتٍ مِّنْ أَكْمَامِهَا وَمَا تَحْمِلُ مِنْ أُنثَىٰ وَلَا تَضَعُ إِلَّا بِعِلْمِهِۦ ۚ وَيَوْمَ يُنَادِيهِمْ أَيْنَ شُرَكَآءِى قَالُوٓا۟ ءَاذَنَّـٰكَ مَا مِنَّا مِن شَهِيدٍ 47 وَضَلَّ عَنْهُم مَّا كَانُوا۟ يَدْعُونَ مِن قَبْلُ ۖ وَظَنُّوا۟ مَا لَهُم مِّن مَّحِيصٍ 48
{47 - 48} Huku ni kujulisha kuhusu upana wa elimu yake Mtukufu na umaalumu wake katika elimu ambayo hapana awezaye kuijua isipokuwa Yeye tu. Alisema: "Ujuzi wa kuijua Saa ya Kiyama unarudishwa kwake tu Mwenyezi Mungu." Yaani, viumbe wote wanarudisha elimu yao kwa Mwenyezi Mungu, na wanakiri kutoweza kwao kuijua, sawa wawe Mitume, Malaika au wengineo. "Na matunda hayatoki katika mafumba yake." Hili linajumuisha matunda ya miti yote katika miji na jangwani. Kwa hivyo, matunda ya mti wowote hayatoki isipokuwa naye anayajua kwa undani. "Wala cha kike hakichukui mimba" katika wanadamu na wanyama ila kwa kujua kwake, "wala hakizai ila kwa kujua kwake." Basi vipi washirikina walimfanya Mwenyezi Mungu Mtukufu kuwa sawa na visivyokuwa na elimu, wala kusikia, wala kuona? "Na siku atakayowaita" washirikina, Siku ya Kiyama, kwa njia ya kuwakaripia na kuonyesha uwongo wao, atawaambia: "'Wako wapi washirika wangu'" ambao mlikuwa mkidai kuwa ni washirika wangu, na mkawaabudu, mkajadili haki kwa itikadi hiyo na mkawafanyia uadui Mitume kwa ajili yao? "Hapo watasema" wakikiri ubatili wa miungu wao na kuwashirikisha kwao na Mwenyezi Mungu: "'Tunakiri kwako ya kwamba hapana miongoni mwetu anayeshuhudia'" usahihi wa uungu wao na ushirika wao. Sisi sote sasa tumekubali ubatili wa kuwaabudu miungu hao na tumejitenga mbali nao. Ndiyo maana akasema: "Na wakawapotea wale waliokuwa wakiwaomba hapo kwanza" badala ya Mwenyezi Mungu. Yaani, zimepotelea mbali itikadi zao na matendo yao waliyomaliza umri wao katika kuabudu visivyokuwa Mwenyezi Mungu na wakadhani kuwa vitawafaa na kuwaepusha mbali na adhabu, na kuwafanyia uombezi kwa Mwenyezi Mungu. Lakini juhudi zao hizo zikapotelea mbali, na dhana yao hiyo ikaambulia patupu na washirika wao hao hawakuwafaa kitu. "Na wakawa na yakini" katika hali hiyo "kuwa hawana pa kukimbilia." Huu ndio mwisho wa mwenye kumshirikisha yeyote na Mwenyezi Mungu. Mwenyezi Mungu anawabainishia waja wake ili wajihadhari na kumshirikisha.